Qırımtatar vatandaş jurnalisti, bloger Nariman Memedeminovnıñ fikirince, oña qarşı «terrorizmge çağırğanı içün» Rusiye FSBsi tarafından açılğan cinaiy dava «faaliyetini, vatandaş fikrini bastırmaq ve Qırımda olıp keçkenlerni aydınlatmamağa imkân bermemek içün» taqip ola. Bu aqta o, Rostov-na-Donu Şimaliy-Kavkaz okrugınıñ arbiy mahkemesinde davasınıñ temeli baqılğan ilk oturışuvda ayttı.
Memedeminovnıñ qayd etkenine köre, «Qırım birdemligi» cemaat birleşmesi qurulğan soñ o, onıñ media bölük reberi oldı. Bundan evel Memedeminov 2014 senesinden başlap 2018 senesi mart ayında apiske alınğan kününe qadar «apis cezaları, Qırımtatar Milliy Meclisiniñ yasağı, terrorizm ve ekstremizm qabaatlavlarını» internette aydınlatqan edi.
«Cinaiy dava malümatlarına köre, maña nisbeten operativ-qıdıruv tedbirlerini 2014 senesiniñ soñunda, siyasiy sebeplernen bağlı esnaslarnı aydınlatmağa başlağanımda keçirmege başladılar. Taqip ve maña qarşı cinaiy davanıñ siyasiy sebepleri bar. Milliy, diniy ve iş sebeplernen bağlı bir taqip. Qırımtatarım, musulmanım ve vatandaş jurnalistim. İşbu taqip alâmetleri BM qararlarında qayd etildi», – dedi Memedeminov.
Bundan ğayrı, o, tahqiqatçı onıñ Ukraina vatandaşlığını körmemezlikke ura.
«Tahqiqatçı Ukraina pasportım olğanını tek «diger malümat» qısmında qayd etti. Faqat, qabaatlav qararını alğanda, Ukraina vatandaşı olğanım yazılmay. Qırımtatarı olğanım da gizlene. Soñra «Özbekistanda doğdı» dep yazmaq içün yapıla, öyle de ola (Rusiyede)», – dep tüşüne vatandaş jurnalisti.
O, mahkemeden bütün qabaatlarnıñ lâğu etilmesini, taqipniñ toqtatılmasını ve azat etilmesini talap etti.
Rusiye tahqiqatı Memedeminovnıñ aytqanlarını daa izaatlamadı.
Rusiyeniñ Rostov-na-Donu şeerindeki Şimaliy-Kavkaz okrugınıñ arbiy mahkemesi mayısnıñ 29-nda qırımtatar vatandaş jurnalisti, bloger Nariman Memedeminovnıñ davasını iyünniñ 10-nda baqmağa qarar aldı.
2018 senesi martnıñ 22-nde Bağçasaray rayonında Rusiye telükesizlik hadimleri ve uquq qoruyıcıları Nariman Memedeminovnıñ evini tinttiler. Ondan soñ faaliyetçi Aqmescitteki Rusiye FSBsi idaresine alıp ketildi. Martnıñ 23-nde mahkeme Memedeminovnı tevqif etti.
Memedeminovnı Rusiye CK-nıñ 205 maddesiniñ 2-nci qısmına ait olğan cinayette (İnternet vastasınen terrosistik areketlerge açıq çağıruvlar) qabaatlaylar.
Martnıñ 23-nde QMC prokuraturası, Ukraina Cinaiy kodeksiniñ 146-ncı maddesiniñ 2-nci qısmı (insannı qanunsız olaraq azatlıqtan marum etüv ya da alıp qaçuv) ve 162-nci maddesiniñ 2-nci qısmında (mesken toqunılmazlığınıñ bozuluvı) qayd etilgen cinaiy qanun bozuluvlarınıñ alâmetleri boyunca malümatnı Mahkemeden eveldki tahqiqatlarnıñ umumiy cedveline kirsetti.
Ukraina Milliy jurnalistler birligi (UMJB) Qırımda Memedeminovnıñ tevqif etilmesine «fikir serbestligi ve, cümleden İnternet ağı vastasınen, informatsiyanı serbest almaq ve darqatmaq aqqınıñ bozuluvı» dedi.
