Rusiye Ukrainağa ücüm etkeni içün ABD Antony Blinken fevralniñ 24-ne keçirilüvi planlaştırılğan Rusiye Tış işler naziri Sergey Lavrov ile körüşüvini lâğu etti.
Blinken, Rusiye naziri ile körüşüvniñ şartlarından biri Rusiyeniñ Ukrainağa ücüm etmekten vazgeçüvi edi, amma şimdi ABD bir fayda körmey, dep ayttı.
«Şimdi, ücüm başlağanını ve Rusiyeniñ diplomatiyadan tamamen vazgeçkenini köremiz, bu körüşüvni şimdi keçirmekniñ bir faydası yoq», – dedi Blinken, Ukraina Tış işler naziri Dmıtro Kyleba ile muzakerelerden soñ Washingtonda çıqışta bulunıp.
Blinken alğan qararı aqqında Lavrovğa haber etti. Onıñ qayd etkenine köre, ABD Rusiye ile diplomatik bağlarına azır, lâkin Moskva «ciddiy tüşüngenini köstermeli».
Blinken qayd etkenine köre, Rusiye prezidenti Vladimir Putinniñ Kreml qoltutqan «LDNR» silâlı gruppirovkalarını tanıma qararı ve izaatları «büyük qasevet doğura» ve Putin Ukrainanı suveren bir devlet olaraq degil, «bağlı» bir devlet olaraq köre.
Devlet kâtibi, Rusiye Ukrainağa qarşı tecavuzını arttırsa, ABD ve ittifaqdaşları sanktsiyalarnı sertleştirecek, dep vade etti.
ABD Maliye nazirligi Rusiyeniñ soñki areketleri sebebinden Rusiye şirketleri, memurları ve balalarına qarşı bir sıra sanktsiyanı kirsetti.
Beyaz Saraynıñ matbuat kâtibi Jen Psaki ABD ve Rusiye prezidentleri Joe Biden ve Vladimir Putinniñ yañı körüşüvi şimdilik planlaştırılmay, dep bildirdi. Sammit Blinken ve Lavrovnıñ körüşüvinden soñ oalcaq edi. Psaki, ABD «diplomatiya qapusını bir vaqıt qapatmaycaq», dep qayd etti.
