28 biñden çoq qırımlı borclarından sebep çetelge barmaq aqqından marum qaldı, dep bildire Qırımdaki Rusiye mahkeme vekilleri Federal hızmetiniñ matbuat hızmeti.
«Olarnıñ büyük qısmı bir yerde çalışmağan vatandaşlardan ibarettir – 31 yaşından 42 yaşına qadar 67,8%. Statistik malümatqa köre, olardan 82,2% – erkek, 17,8% – qadınlar», – dep aytıla haberde.
Matbuat hızmeti qayd ete ki, ekseriyette para cezaları, aliment ve kommunal ödemeler aqqında laf kete.
Çetelge çıqması yasaq etilgenler arasında mahkeme qararı esasında borcları alınacaq vatandaşlar da bar.
2018 senesi noyabr ayında Rusiye Yuqarı mahkemesi borcu olğanlardan yekâne mesken yerini çekip almağa izin berdi.
Rusiyeniñ «Krımstat» müessisesiniñ malümatına köre, işğal etilgen Qırım ealisiniñ kommunal hızmetler boyunca umumiy borc miqdarı 2018 senesi iyün ayınıñ soñunda 4,2 milliard ruble (1,6 milliard ğrıvnâ – QA) olğan edi. Eñ çoq Aqmescit, Yalta ve Keriçte borclar qayd etile.
2017 senesi Rusiye Devlet duması memuriy para cezalarnı, kommunal hızmetlerni ödemegen ve banklarda 30 biñ rublege qadar kreditlerni qapatmağan insanlarğa memleketni terk etmege yasaq etken qanunnı qabul etti. Daa evel bu raqam 10 biñden ziyade degil edi. Qanun işğal etilgen Qırımda da amelge keçirildi.
