Ukrayina prezidenti Volodımır Zelenskıy, memleket NATO-ğa qoşulmasa, özek silâsı telükesizlikniñ yeterli kefaleti ola bile, dep bildirdi. Bu aqta o, britaniyalı jurnalist Pirs Morganğa bergen intervyüsında ayttı.
Jurnalist Zelenskıyden Ukrayinağa Vladimir Putinni yañı ücümden saqlamağa imkân berecek telükesizlik kefaletleri aqqında soradı. Zelenskıy, Ukrayinanıñ NATO-ğa qoşuluvı yıllar ya da on yıllarğa uzansa, onda "mutlaq adaletli sual" peyda ola, dep cevap berdi
"Bütün bu vaqıt devamında bu yamanlıqtan bizni ne qorçalaycaq? Ne qoltutuv paketi? Ne kibi raketalar? Bizge özek silâsını bereceklermi? Öyle olsa, bizge özek silâsını bersinler. Bizge Rusiyeni toqtatmaq içün yeterli miqdarda raketalar berilecekmi? Emin degilim, amma bu yardım eter edi, dep tüşünem. Ya da Rusiyeniñ özek raketalarını nasıl raketalar toqtatıp olur? Bu ritorik bir sual. Şunıñ içün böyle yapacaqmız: özek silâsını qaytarıñız, raketa komplekslerini beriñiz, ortaqlarımız millionlıq ordunı maliye etmege yardım etecek, kontingentniñizni memleketimizniñ turğunlıq istegen yerlerine avuştırıñız, insanlar barışıqta olsun", — dep ayttı Zelenskıy.
Devlet yolbaşçısı, eger Ukrayina NATO terkibine kirmese, "Putin toprağımızdan bütünley çıqmaq kerek", dep qoştı, bundan soñ Kıyiv bütün ğayıplar içün maddiy tazminat meselesini köterecek.
"O (Putin) istilâ etti, çünki biz NATO azaları olacağımızdan qorqtı. Yahşı, biz NATO azaları degilmiz — toprağımıznı qaytarıñız. Bu aynen böyle baqılmalı", — dep qoştı Zelenskıy.
Ukrayina akimiyeti, memleket içün NATO azalığı "yekâne kerçek telükesizlik kefaletidir", dep tüşüne. Bunı 2024 senesi dekabr ayında Ukrayina Tış işler nazirligi bildiridi. Nazirlik böyle beyanatnı Reuters agentliginiñ NATO-da Ukrainanı ittifaqqa davet etüv meselesi boyunca añlaşma olmağanını bildirgeninden soñ seslendirdi.
Ukrayina 1994 senesi dekabr ayında Budapeşt memorandumı imzalanğan soñ özek silâsından vazgeçti. Vesiqa, özek silâsından vazgeçüvniñ qarşılığında Ukrayinanıñ topraq bütünligine kefalet bermekni teklif ete edi. Vesiqanı Rusiye, Ukrayina, Büyük Britaniya ve ABD imzaladılar.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
