Rusiyeniñ Ukrayinağa qarşı istilâsı 10 yıl evelsi başlandı, ve ABŞ qırımtatar ve diger vatandaşlarnıñ insan aqları bozulğan, hırsızlanğan ve işkencege oğratılğan Qırım ilhaqı ıntıluvını iç bir vaqıt tanımaycaq, dep bildirdi Brink.
''Rusiyeniñ işğali ile insan aqları bozula, qırımtatarlarnı ve yarımadada yaşağan diger Ukrayina vatandaşlarını alıp keteler ve işkencege oğratalar. Dünya qırımtatarlar Rusiye tarafından siyasiy repressiyalarnıñ obyekti olğanına şaat oldı'', - dep qayd etti o.
Diplomat qayd etti ki, Rusiye ukrayin vatandaşlarınıñ, şu cümleden balalarnıñ, sürgün etilüvi ve qanunsız avuştırılmasını milletniñ kimligini yoq etmek içün qullana. Amma qırımtatarlarnıñ ve Ukrayinanıñ diger tamır halqlarınıñ medeniyeti ve ananeleri canlı ve küçlü qala, dep qayd etti Brink.
''Rusiyeniñ bu qanunsız areketiniñ 10-ncı yıldönüminde Amerika Birleşken Devlernleri deñişmey: bizler Qırımnıñ Rusiye tarafından ilhaqı ıntıluvını tanımaymız ve iç bir vaqıt tanımaycaqmız. Qırım Ukrayinadır", - dep qayd etti elçi.
Fevralniñ 26-nda cemaatçılıq tarafından teşebbüs etilgen Qırımnıñ Rusiye işğaline qarşı tirenüv künü qayd etile. Bu künü Ukrayinada ve bütün dünyada qırımlılarğa ve memleketniñ topraq bütünligine qoltutuv aktsiyaları, munaqaşalar, forumlar, mitingler, yürüşler keçirile.
2014 senesi fevral 26-da QMC Yuqarı Radasınıñ binası ögünde Ukrayinanıñ topraq bütünligine qoltutuv mitingi olıp keçti. O vaqıt miting iştirakçilerine Rusiye tarafdarları, şu cümleden "Rusiye birligi" firqasından olğan faaller qarşılıq köstergen edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
