Rusiyeniñ Ukrayinağa qarşı başlatqan cenkni Kıyivge yardım berilüvni toqtatıp tez vaqıtta bitirmek mümkün olur edi, amma Avropa Birligi böyle variantqa razı degil. Bunı Avropa Birliginiñ tış siyaseti ve telükesizlik siyasetiniñ yuqarı vekili Jozep Borrel oktâbrniñ 24-nde "Avropa ve sulh" konferentsiyası vaqtında bildirdi.
Onıñ sözlerine köre, ukrayinalılar özlerini Rusiyeniñ tecavuzından öz başına qorçalap olamaylar ve Avropanıñ yardımına ihtiyac bar. O, Avropa Birligi içün Ukrayinanıñ Vladimir Putinniñ rejimine teslim olmasını qabul etilmez olğanını da qayd etti.
"Putinniñ Kıyivde qoqla ükümet qurmasına ve Poloniya ile sıñırda ordusını yerleştirmesine yol bermemelimiz", - dep bildirdi o.
Bu aynıñ başında Jozep Borrel Ukrayinağa arbiy yardımnı paranen temin etmek içün Avropa Birliginiñ uzun müddetli mecburiyetler almasına teklif etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
