Ukrayina prezidenti Volodımır Zelenskıy Felemenk baş naziri Mark Rütte ile muzakereler keçirdi. Muzakereler vaqtında cebedeki vaziyet ve Ukrayianıñ Avropağa integratsiyası aqqında laf etkenler.
"Felemenk baş naziri Mark Rütte ile laf ettim. Cebedeki mevcut vaziyet aqqında malümat berdim; Rusiyeniñ tecavuzına qarşı cenkte Felemenkniñ Ukrayinağ köstergen mudafaa yardımı içün teşekkür ettim. Ukrayinanıñ Avropağa integratsiya yolunı muzakere ettik. Felemekniñ destegine ümüt etemiz!", - dep yazdı Zelenskıy Twiterde.
Ukrayina, Gürcistan ve Moldovağa Avropa Birligine namzet statusınıñ berilmesi ile baglı qararnı Avropa Biriligi liderleri iyünniñ 23-24 Brükselde keçirilecek nevbetteki sammitte qabul etecekler.
Ukrayinanıñ baş naziriniñ Avropağa integratsiya meseleleri muavini Olga Stefanişina, AB-niñ eki memleketi Ukrayinanı şimdilik namzet kibi körmegenini bildirgen edi.
Bloomberg agentliginiñ malümatına köre, Daniya ve Felemenk Avropa Birligine qoşulmaq içün Ukrayinağa azalıq namzeti statusınıñ berilmesine qarşıdır.
Fevralniñ 28-nde Ukrayina prezidenti Volodımır Zelenskıy AB azalıq arizasını imzaladı.
Ukrayinağa azalıq namzeti statusınıñ berilmesine dair qarar bir ağızdan qabul etilmelidir.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
