Rusiye tarafından desteklengen aydutlar noyabrniñ 24-nde Donetsk vilâyetinde ateşkes rejimini bozdı, dep bildire Ukraina birleşken quvetler tedbirleriniñ ştabı. Ukraina arbiyleri arasında yaralanğanlar yoq.
Azatlıq Radiosınıñ bildirgenine köre, aydutlar Vodâne civarlarında 82 millimetr kalibrli mayın atıcılarnı, Taramçuk civarında büyük kalibrli qurşunatqıçlarnı, Çervonoğorivka yanında tanklarğa qarşı granata atıcı ve qurşunatqıçlarnı qullandı.
Lugansk vilâyetinde ateş qayd etilmedi.
«DNR» ve «LNR» gruppirovkaları noyabrniñ 24-nde olğan cenk areketleri aqqında haber etmey.
Birleşken Milletlerniñ 2019 senesi oktâbrniñ 31-ndeki malümatına köre, Ukraina şarqındaki Rusiye gibrid istilâsı neticesinde 13 000-den 13 200 insanğa qadar elâk oldı, olardan eñ azından 3 354 vatandaş, tahminen 4 100 ukrain arbiyi ve 5 650 Rusiye gibrid silâlı birleşmeleriniñ azası ola.
