Link açıqlığı

Saatnıñ esas haberi

Birleşken Milletlerniñ Havfsızlıq şurası Ukrainanıñ işğal etilgen topraqlarındaki vaziyetni muzakere etecek


BM Havfsızlıq şurasınıñ toplaşuvı

Oktâbrniñ 30-nda Birleşken Milletlerniñ Havfsızlıq şurası Ukrainanıñ işğal etilgen topraqlarındaki vaziyetke bağışlanğan açıq toplaşuv keçirecek.

Birleşken Milletlerdeki Ukraina missiyasınıñ malümatına köre, toplaşuv Kyiv saatine köre saat 21:00-de başlaycaq (Qırım saatine köre 22:00-de).

Missiyanıñ haber etkenine köre, Ukraina, Roma statusı çerçivesinde 2013 senesi noyabr ayından başlap Ukraina toprağında olğan cinayetlerniñ tahqiq etilmesi boyunca halqara ceza mahkemesiniñ tanılmasına dair eki qarar bergen edi. Bunı oktâbrniñ 29-nda BM Ukraina elçisi Volodımır Yelçenko BM Baş assambleyasınıñ toplaşuvında Halqara ceza mahkemesiniñ qararınen bağlı çıqış yapıp bildirdi.

Havfsızlıq şurası Rusiyeniñ Ukrainağa qarşı istilâsını mayısnıñ 29-nda muzakere etken edi.

Ukraina tış işler naziri Pavlo Klimkin Rusiyege qarşı basqı halqara seviyede quvetleştirilse, Kreml Donbasta barıştırıcılarnıñ yerleştirilmesi şartlarına ve Ukraina, ABD ve diger memleketler istegen şartlarğa razı olmağa mecbur olur, dep aytqan edi.

Donbastaki silâlı zıddiyet Rusiye Qırımnı işğal etken soñ 2014 senesinden berli devam ete. Ukraina ve Ğarp Rusiyeni separatistlerge qoltutqanında qabaatlaylar. Kreml bunı inkâr ete. Anda Donbasta ancaq Rusiye «göñüllileri» ola bile, deyler. BM malümatına köre, zıddiyet devamında 10 300 insan elâk oldı.

XS
SM
MD
LG