Salı künü, fevralniñ 23-nde, BM Baş Assambleyasında Ukrainanıñ vaqtınca işğal etilgen topraqları, hususan işğal altındaki Qırımdaki vaziyetnen bağlı munaqaşa keçirilüvi planlaştırıla.
BM saytında derc etilgen kün tertibine köre, munaqaşalar Kyiv saatınen 17:00-ğa planlaştırıla.
Bu munaqaşalar Ukrainanıñ teşebbüsinen keçirile. Ukrainanıñ BM daimiy vekili Serğiy Kıslıtsâ bildirgenine köre, kün tertibiniñ noqtalarından biri Donbas maruzasınıñ muzakeresi olacaq, Ukraina tarafı Rusiye tarafından qanunsız teşkil etilgen «Rus Donbası» forum meselesini köterecek.
Ukraina Tış işler nazirligi, fevralniñ 17-nde Qırımda olğan tintüv ve tutuvlar aqqında malümatnı BM Baş Assambleya baqmasına çıqarmağa planlaştıra, dep bildirgen edi.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
