Aqmescitteki ekinci «Hizb ut-Tahrir davası» mabüsleriniñ sıñırlav tedbiri uzatılğan mahkemelerden birinde prokuror mabüslerniñ SİZOda qalmasını istedi. Onıñ aytqanına köre, apiste bulunğan yigirmi beş qırımtatarı, «başqaları yapqanı kibi», tahqiqattan saqlana bile. Advokatlar ğayıp olğan Edem Yayaçikov (2019 senesi martnıñ 27-nden berli bulunğan yeri belli degil – QA) aqqında aytılğanından emin edi. Bir qaç künden soñ yañı tafsilâtlar peyda oldı: mabüslerniñ imayecileri bu davanıñ daa üç şübhelisi aqqında bildirdi.
Advokat Edem Semedlâyevniñ bildirgenine köre, yañı şübheliler dava malümatlarında başta yoq edi. Onıñ aytqanına köre, olar aqqında 2019 senesiniñ soñunda haber aldı, amma imayeciler bu malümatnı telükesizlik maqsadınen aydınlatmamağa qarar alğan edi. «Vesiqalarnı tek mahkemede (2020 senesi fevralniñ 10-nda olğan oturışuv aqqında aytıla – QA), uzatuv mahkemesinde, kördik, bundan evel vesiqalarnı kimse bermegen edi, tek soyadlarını bile edik. Ve bu mahkemede vesiqa peyda oldı, federal qıdıruvğa ilân etüv qararı», – dep ayttı Semedlâyev.
Üç qırımtatarı aqqında aytıla: Eldar İbragimov (1981 senesi doğğan), Ruslan Zaurov (1980 senesi doğğan) ve Ruslan Bulgakov (1989 senesi doğğan) (şahsiy malümatları advokatnıñ izninen derc etile – QA). Semedlâyevniñ aytqanına köre, bu insanlar Rusiyede degil ve federal qıdıruvğa ilân etildi.
«Ne vaqıt ketkenleri belli degil. (Dava – QA) açılmazdan evelmi, açılğan soñmı ketkenler… Amma açılmazdan evel ketkenler, dep tüşünem. Açılğan soñ olsa edi, endi SİZOda bulunacaq ediler», – dep tüşüne o.
Advokatnıñ aytqanına köre, Aqmescitteki ekinci «Hizb ut-Tahrir davasınıñ» yañı mabüsleri cemaat arasında tanılmay. Amma, onıñ aytqanına köre, olarnıñ cemaat yaşayışında iştirak etmesi mümkün edi. «Olar mahkemelerge kelip, bir şeyler yollağandırlar, para toplamağa yardım etkendirler», – dep tahmin ete imayeci.
Advokatnıñ bildirgenine köre, İbragimov, Bulgakov ve Zaurov federal qıdıruvğa ilân etilgenlerini kütleviy haber vastalarından bildi. «Malümat aydınlatılğan soñ, olarnıñ haberleri oldı. Maña başqa insan telefon etti, onıñ da soyadı İbragimov ola ve adı «E» arfinden başlana, Qırımda buluna, onı qıdıralarmı, dep soradı. O olmağanını añlattım. Kütleviy haber vastalarından haber aldılar. Qıdırılğan insanlar da öyle», – dep bildirdi advokat.
Aqmescitteki ekinci «Hizb ut-Tahrir davası» mabüslerniñ sayısına köre eñ büyük Qırım davası ola. Edem Semedlâyevniñ aytqanına köre, FSB, 29 mabüste toqtamaycaqtır.
«Mence, yañı şahıslar qayd etildi dep, er vaqıt qoşa bileler. Meselâ, Bağçasaraynıñ ekinci gruppasında («Hizb ut-Tahrir» – QA) operativ hadim camide keçirilgen gizli körüşüvde iştirak etken er kes qayd etilmedi ve tutulmadı, dep aytqan edi. Olar qıdıralar. Bu davada da qıdıralar. Başqa insannı begenmeyip, onı da terrorist dep ilân eterler», – dep tarif etti advokat.
Aqmescitteki ekinci «Hizb ut-Tahrir davasınıñ» temeli şimdilik baqılmadı.
2019 senesi martnıñ 27-nde Rusiye quvetçileri Qırımda qırımtatarlarnıñ, hususan «Qırım birdemligi» faalleriniñ evlerinde tintüvler keçirdi. Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutuldı. Edem Yayaçikov ğayıp oldı, onıñ bulunğan yeri martnıñ 27-nden berli belli degil. Soñra daa bir şübheli Raim Ayvazov tutuldı.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlarnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
