Ukrayına Silâlı quvetleriniñ Baş ştabı fevralniñ 24-nde saba – Rusiyeniñ tam istilâsınıñ yılında – cebeniñ vaziyeti aqqında bildirdi.
«Rusiye Federatsiyası bir yıldan berli Ukrayınağa qarşı silâlı istilâ kerçekleştirmege tırışa. Al-azırda esas ğayretler Kupânsk, Liman, Bahmut, Avdiyıvka ve Şahter yönelişlerinde kösterile. Keçken künü imayecilerimiz bu yönelişlerde duşmannıñ 100 ücümini qaytardı», – dep aytıla haberde.
Ukrayına Silâlı quvetleriniñ Baş ştabı qayd etkenine köre, Rusiye askerleri arasında «büyük ğayıplarnı» qapatmaq içün Rusiye Federatsiyasınıñ ordusı gizli bir seferberlik devam ettire.
«Hususan Kavkaz regionlarında mecburiy seferberlik devam ete, insanlarnı Ukrayınadaki cenk areketlerine yollaylar. Bütün erkekler seferber etile, sağlıq vaziyetleri ve cenkleşip-cenkleşmemek istegine baqmadan. Seferber etilgenlerniñ büyük sayısı – penitentsiar müessiselerde yatqan ya da cezasını çekmege devam etken vatandaşlar. Ukrayınadaki cenkte iştirak etmege razı olğan mabüsler azat etile», – dep bildirdi Ukrayına Silâlı quvetleriniñ Baş ştabı.
Bıltır fevralniñ 24-nde Rusiye bütün sıñırda ve Beyazrusiyeden Ukrayınağa tam istilâ başlattı. Ukrayına Silâlı quvetleriniñ Baş ştabı malümatına köre, Rusiye bu vaqıt devamında Ukrayınağa aman-aman beş biñ raketa attı.
BM eñ az 8006 vatandaşnıñ ölümini qayd etti – daa 13 287 kişi soñki 12 ayda yaralandı. Teşkilât kerçek raqamlar daa yüksek, dep qayd ete.
Kreml istilânı inkâr etip, yapqanlarını «mahsus arbiy operatsiya» dep adlandıra. Onıñ maqsadı olaraq ise «Ukrayınanıñ askeriylesizleştirilüvi ve denatsifikatsiyası» ola eken.
Ukrayına Silâlı quvetleriniñ vekili Yuriy İgnat Arbiy ava quvetleri fevralniñ 23-24-nde Rusiyeniñ provokatsiyalarını bekley, dep ayttı. Onıñ bildirgenine köre, Ukrayına arbiyleri quvetleştirilgen nevbetçilik tuta.
Ukrayına Mudafaa nazirliginiñ Baş istihbarat idaresiniñ yolbaşçısı Kırılo Budanovnıñ fikirince, Rusiye fevralniñ 24-ne «büyük olmağan raketa darbesini» planlaştıra bile.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
