Qırımtatar resurs merkeziniñ ekspertleri 2019 senesi işğal etilgen Qırımda insan aqları bozuvlarını sayıp çıqtı. Bu malümatqa köre, bıltır yarımadada 300 insan apiske alındı ve 150-den çoq tutuldı.
İşbu maruzanı yanvarniñ 22-nde Qırımtatar resurs merkeziniñ reberi Eskender Bariyev ve teşkilâtnıñ bağ idarecisi Elvir Sagirman Kyivdeki matbuat konferentsiyasında taqdim ettiler, dep bildire Qırım.Aqiqat mühbiri.
«2019 senesi devamında Qırımtatar resurs merkezi 86 tintüvni, 157 insannıñ tutuluvını, 194 sorğu ve subetni, 43-ü yañı cinaiy davalarnen bağlı 335 apis cezasını qayd etti. Qırımnıñ siyasiy mabüslerine qarşı çıqarılğan 33 üküm, apiste tutuv müddetleri 252 kere uzatıldı. Bundan ğayrı, 578 insannıñ adil mahkeme, 90 beden ve maneviy sağlıqnıñ eñ yüksek seviye aqqı bozuldı, 69 siyasiy mabüsniñ avuştırıluvı belli», – dep qayd etti Bariyev.
Onıñ aytqanına köre, toplanğan malümat qırımlılarnıñ aqlarını qorumağa yardım etecek.
«Qırımda olğanlar, Qırımda muntazam sürette bozulğan insan aqları ve taqdim etmege tırışqan sistematik talilimiz – bu malümatnıñ insanlarğa, missiyalarğa, diger aq qorçalayıcı teşkilâtlarına berilmesi içün pek müim. Böylece, belli cevap olsun. Vatandaşlarımıznıñ aqlarını qorumaq içün başqa çare yoq», – dedi Bariyev.
Faaller, siyasiy mabüslerniñ qabaatlavları sertleşti ve tasil, medeniyet, din ve askerlik saasında çeşit bozuvlar olğanını qayd etti.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
Rusiye akimiyeti milliy ve diniy sebeplerden taqip olğanını inkâr ete.
Rusiye Tış işler naziri Sergey Lavrov, işğal etilgen Qırımda insan aqlarınıñ bozuluvı aqqında laflar uydurıldı, dep bildirdi.
Qırımtatar Resurs Merkezi – qırımtatarlarnıñ siyasiy ve cemaat faalligi seviyesini arttırmaq, qırımtatar halqınıñ aq ve serbestliginiñ qorunmasına yardım etmek, qırımtatarlarnıñ milliy kimligini saqlap qalmaq, qırımtatar medeniyetini inkişaf ettirmek maqsadınen qurulğan cemaat teşkilâtıdır.
