Bir yıl devamında ilhaq etilgen Qırımnıñ qapalı limanlarına kirgenleri içün, 15 gemige çetel bayraqlar altında yürmekni yasaq ettiler.
"Avropa aqiqatı" yazğanı kibi, bunı Halqara Deñiz teşkilâtı yanında Ukrainanıñ daimiy vekâlethanesi bildirdi.
Bu, hususan, Togo bayrağı altında altı, Panama bayrağı altında üç, Palau bayrağı altında bir, Moğolistan bayrağı altında bir, Lübnan (Livan) bayrağı altında eki, Komor adaları bayrağı altında bir ve Kameru bayrağı altında bir gemi.
2017 senesi avgust ayından berli umumen 46 gemige çetel bayraqları altında yürüş yasaq etildi.
Ukraina İnfrastruktura nazirliginiñ malümatına köre, 2014 senesinden berli Qırım limanlarına eñ azından 868 çetel bayraqlı gemi kirdi.
2014 yılı iyül ayından Ukraina ükümeti,, Rusiye ilhaq etken bütün yarımada limanlarını halqara gemicilik içün resmiy olaraq qapattı.
