Rusiyeniñ Qırım işğaliniñ birinci qurbanı dep adlandırılğan qırımtatarı Reşat Ametovnıñ hırsızlanuvı ve öldürilüvi em işğal altındaki Qırımda, em esas Ukrainada tahqiq etilmey, dep bildire qırımtatar faali Zair Smedlâyev.
«Ne o, ne de başqa tahqiqat organları bu tedbirlerni yekünlep olamay, çünki cinayette qabaatlı olğanlar tahqiqat organlarına ketirilmedi. Yani tahqiqat hulâsa çıqardı, şübhelilerni qayd etti. Başqa bir şey yapmılmadı. Cinayetçilerniñ soyadlarını er kes bile», – dep bildire Smedlâyevniñ aytqanlarını «Qırım birdemligi».
Onıñ fikirince, «akimiyet bu cinayetniñ doğru ve tarafsız tahqiq etilmesini istese, bu cinayetçilerni ketirüv, tahqiqat tedbirlerini keçirüv, davanı mahkemege berüv ve qabaatlılarnı mesüliyetke çeküv usullarını tapmaq kerek edi».
Faalniñ hatırlatqanına köre, Qırımda Reşat Ametovnıñ hırsızlanuvı ve öldürilüvi – yarımadada yekâne degildir.
«Ervin İbragimov, Seyran Zinedinov, Abdureşit Cepparovnıñ oğlu ve torunı ve diger insanlar. Bu hırsızlanğan insanlarnıñ bulunğan yerini ne tuvğanları, ne yaqınları bile. Er kes bu vaziyette boysunmamaq telükeli olğanını körsin dep, bunı açıq yapqanlar. Bugünki mahkeme davaları da o qorquzuv aktsiyalarınıñ devamı ola. Şimdi ekstremist ve terrorist dep, uzun apis cezalarına üküm eteler», – dep ayttı Zair Smedlâyev.
2014 senesi martnıñ 3-nde saba Aqmescitniñ Maryino qasabasında yaşağan üç balanıñ babası, 39 yaşında Reşat Ametov evden çıqqan edi. Tuvğanlarına arbiy komissarlıqqa barıp, Ukraina ordusınıñ göñüllileri sırasına yazılacağını ayttı. Video kameraları onı, Rusiyeniñ Qırım işğaline qarşı Lenin meydanında Qırım ükümetiniñ binası ögünde bir kişilik narazılıq keçirgen kişini, qayd etti. Videoda körüne ki, Qırım «samooboronasınıñ» bir qaç vekili onı meydanda tutıp, maşinağa mindire. Eki aftadan soñ Reşat Ametov Qarasuvbazar rayonınıñ Ortalan (Zemlâniçnoye) köyü yanındaki tarlada ölü tapıldı. Erkekniñ cesedinde işkence izleri bar edi, başı şeritnen sarılğan edi, yanında ise qırçma tapılğan edi. Daa soñra çıqarılğan neticelerge köre, ölümniñ sebebi közüne saplanğan pıçaq yarası oldı.
Qırım Muhtar Cumhuriyetiniñ prokuraturası sentâbrniñ 10-nda Reşat Ametovnı öldürgenler belli oldı, dep bildirdi. Qırım Muhtar Cumhuriyetiniñ politsiyası qırımtatar faali Reşat Ametovnıñ hırsızlanması ve öldürilüvinden şübheli sayılğan «Qırım samooboronasınıñ» eki iştirakçisi ve Rusiye Silâlı Quvetleriniñ sabıq arbiyini qıdıruvğa ilân etti.
2019 senesi dekar ayında İnterpol qırımtatarı Reşat Ametovnıñ hırsızlanması ve öldürilüvinden şübheli sayılğan üç kişini qıdıruvğa ilân etmege razı olmadı.
2017 senesi Ukrainanıñ beşinci prezidenti Petro Poroşenko 2014 senesi baarde öldürilgen qırımlı Reşat Ametovğa Ukraina Qaramanı unvanını berdi.
BM insan aqları Yuqarı komissarınıñ idaresi azırlağan maruzasında Ametovnıñ öldürüvini mahkemesiz idam dep adlandıra.
