Bir sıra uquq qoruyıcı teşkilât işğal etilgen Qırımda yaqalanğan vatandaş jurnalisti Kulamet İbraimovnı azat etmege çağırdı.
Sekiz jurnalist ve uquq qoruyıcı teşkilât jurnalistlerge qarşı kösterilgen qabaatlarnı lâğu etmege, Kulamet İbraimovnı azat etmege, Lutfiye Zudiyevanı cöremeden boşatmağa ve Qırımda kütleviy haber vastalarınıñ temsilcileriniñ taqip etilmesini toqtatmağa çağırdı. Olarnıñ arasında:
- Jurnalistlerni qoruma komiteti (CPJ, ABD)
- Avropa jurnalistler federatsiyası (EFJ, Belçika)
- Reporters Without Borders (Frenkistan)
- Ukrayina milliy jurnalistler birligi (Ukrayina)
- European Centre for Press and Media Freedom (Almaniya)
- FLD (İrlandiya)
- Women in journalism (Avstriya)
- Council of Europe Media Freedom.
Bundan ğayrı, Ukrayina uquq qoruyıcı teşkilâtlarınıñ keniş koalitsiyası jurnalistlerni destekledi. Olarnıñ episi Rusiye akimiyetiniñ areketlerini takbih etti ve olarğa qanunsız dedi.
İyülniñ 27-nde mahkeme binası ögünde şikâyet arizası baqılğan Nariman Celâl ve ağa-qardaş Asan ve Aziz Ahtemovlarnıñ tarafdarları toplaştı. Davalarında şikâyet arizası baqılacaq. Aq qorçalayıcılarnıñ malümatına köre, saat 10:30-da 13 insan tutuldı – 10 erkek ve üç qadın.
Belli olğanı kibi Rusiye kontrolindeki Qırım Yuqarı mahkemesiniñ binası ögünde tutulğanlar arasında qırımlı aq qorçalayıcı Lutfiye Zudiyeva, siyasiy mabüs Aziz Ahtemovnıñ anası Zarema Ahtemova, «Qırım birdemliginiñ» mühbiri Kulamet İbraimov ve siyasiy mabüs Nariman Celâlnıñ qardaşı Ruslan Celâlov edi.
Berilgen malümatqa köre, Aqmescitteki Jeleznodorojnıy rayon mahkemesi siyasiy mabüs Aziz Ahtemovnıñ anası Zarema Ahtemovağa 12 biñ ruble para cezasını berdi, faal Rustem Üseinovğa ise 15 biñ ruble.
"Qırım birdemligi"niñ vatandaş jurnalisti Kulamet İbraimovnı Jeleznodorojnıy rayon mahkemesi Federatsiyası Memuriy uquq bozuvları qanunnamesiniñ 20.2.2 maddesiniñ 4 qısmı ile 5 kün apis cezasına mahküm etti.
Qırımlı uquq qoruyıcı Lutfiye Zudiyeva 12 biñ ruble, siyasiy mabüs Nariman Celâlnıñ ağası Ruslan Celâlov 15 biñ ruble para cezasına mahküm etildi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
