Avropa komissiyasınıñ yolbaşçısı Kıyivge fevralniñ 24-ne keçken gecesi keldi - Rusiyeniñ Ukrayinağa istilâsı başlağanınıñ ekinci yıllığında. Ursula von der Leyyen, özüniñ içtimaiy ağında yazğanı kibi, "qorqunç yıldönümi" munasebetinen Ukrayinağa kelmege qarar bergen ilk çetel musafirlerinden biri edi.
Von der Leyyenniñ Ukrayina prezidenti Volodımır Zelenskıy ve memleketniñ diger yolbaşçılarınen muzakereleri planlaştırıla. Avropa Kıyivge Rusiye istilâsına qarşı küreşte yardım etecek.
"Biz Ukrayinanı maliyeviy, iqtisadiy, arbiy ve maneviy ceetten daa qattı destekleymiz. Bu memleket niayet serbest olğanına qadar", - dep qayd etti Kıyivge kelgen soñ Ursula von der Leyyen.
İtaliya ükümetiniñ beyanatına köre, Avropa komissiyasınıñ yolbaşçısı Ukrayina paytahtına Polşadan trennen keldi, onıñ yanında İtaliya baş naziri Georgiy Meloni, Kanada ükümetiniñ başı Jastin Trudo ve Belçika baş naziri Aleksandr De Kro bar edi.
MALÜMAT: Ukrayinağa qarşı Rusiye silâlı ücümi 2022 senesi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
