Rusiye quvetçileri, geceden berli Keriç köpründe tutulğan qırımtatar faalleriniñ «areket serbestligi aqqını» bozdı, dep ayttı advokat Nikolay Polozov.
Advokatnıñ fikirince, şimdi Rusiye Qırımnı öz uquq alanında tutsa, «qırımtatar faallerini «bir regiondan başqa regionğa» kirsetmemek içün qanuniy sebepleri yoqtır».
«Halqara añlaşma ve şartname maddelerinden ğayrı, quvetçilerniñ bu yapqanları Rusiye Anayasasınıñ 27-nci maddesini boza. Rusiye uquq alanına emiyet bermeyip, problemge daa keniş bir tarzda baqsaq, Rusiye quvetçileriniñ areketlerinde halqara añlaşma ve şartnamelerniñ bir sıra bozuluvı bar, Umumiy insan aqları beyannamesiniñ 13-ünci maddesi, Avropa insan aqları ve esas serbestliklerni qoruv beyannamesiniñ 14-ünci maddesi ya da er çeşit ırqiy ayırım şekillerini yoq etüv Halqara şartnamesi bozula», – dep bildirdi Polozov Facebookta.
«Qırım birdemligi» birleşmesi bildirgenine köre, noyabrniñ 2-nde aqşamdan berli Qurmandaki «Hizb ut-Tahrir davasınıñ» mabüslerine üküm çıqarılacaq Rostov-na-Donuğa Qırımdan yol alğan yüzlernen qırımtatarı Keriç köpründe Rusiye yol patrul hızmetiniñ hadimleri tarafından tutula. Rusiye uquq qoruyıcı organları vaziyetni resmiy şekilde izaatlamay.
Noyabrniñ 3-nde mezkür dava mabüslerine üküm çıqarılacaq, dep beklenile. prokuror qırımtatarlarnı qabaatlı tanıp, sert rejimli koloniyada qalmalarına üküm etmege talap etti: Rustem Emiruseinov içün 1,5 yıl nezaret ile 18 yıl apis, Arsen Abhairov içün 15 yıl, Eskender Abdulganiyev içün 16 yıl.
2019 senesi fevral ayında Qurman rayonınıñ Büyük Onlar (Oktâbrskoye) qasabasında Rusiye uquq qoruyıcıları tintüv keçirdi. Daa soñra Aqmescitteki FSB idaresine Eskender Abdulganiyev, Arsen Abhairov ve Rustem Emiruseinov alındı.
Rusiye Federal telükesizlik hızmeti Qurman rayonınıñ üç sakinini «Hizb ut-Tahrir» teşkilâtında iştirak etkeninden şübheli sayıp yaqalağanını tasdıqladı.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
