Rusiyede keçken künü 4268 yañı koronavirus hastası qayd etildi. Bunı memleketniñ operativ ştabı bildire. 6 biñ hasta qayd etilgen cumaertesi kününden azdır. Bir künde COVID-19 diagnozı tasdıqlanğan 44 insan can berdi, dep haber ete Azatlıq Radiosı.
Rusiyede hastalanğanlarnıñ sayısı 47121-ge arttı (dünyada onuncı yer), 405 kişi koronavirus yuqunçından vefat etti.
Moskvada 2026 hasta qayd etildi, 3500 olğan cumaertesinden bayağı azdır. Rusiyede hasta sayısına köre Moskva birinci yerdedir, hastalarnıñ yarısı anda qayd etile. Keçken künü Moskvada 28 kişi vefat etti.
«Nastoyaşçeye Vremâ» bildirgenine köre, vefat etkenler arasında 44 yaşından 98 yaşına qadar insanlar bar. Çoqusınıñ hastalıqları bar edi: gipertoniya, piyelonefrit, yürek qusurı, miasteniya, aqciger hastalığı. Vefat etken üç insan şeker hastası edi. Daa ekisiniñ hronik bronhiti bar edi, dep qayd ete koronavirus ile küreş operativ ştabı.
Rusiye regionlarınıñ çoqusında martnıñ soñundan ya da aprelniñ başından berli karantin tedbirleri alına, aprelniñ 30-na qadar tatil ilân etildi, alış-veriş merkezleri qapalı, kütleviy tedbirlerniñ keçirilüvi yasaqlana. Kremlniñ matbuat kâtibi Dmitriy Peskov, bu afta aprelniñ 30-na qadar devam etecek tedbirlernen bağlı qarar alınacaq, dep bildirdi. Qırğınlıq eñ yaqın vaqıtta zirvege irişecek, dep ümüt etkenini bildirdi.
Dünyada 2 million 400 biñ koronavirus hastası bar, 160 biñden çoq kişi vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
