Qırımda keçken künü 9 hasta koronavirus yuqunçından vefat etti, dep bildire Qırımnıñ Rusiye sağlıq nazirligi. Müessise malümatına köre, Qırımda pandemiya vaqtında 509 kişi COVID-19-dan vefat etti.
«2968 insan (covid) ambulator tedaviylevde, 2866 kişi (covid ve pnevmoniya) hastahanelerde buluna, observatorlarğa alınğanlar yoq. Umumen 25187 COVID-19 hastası qayd etildi. Tüzelgen 20253 kişi çıqarıldı», – dep aytıla haberde.
Keçken künü Qırımda 333 yañı koronavirus hastası qayd etildi.
Qırım ve Aqyardaki Rospotrebnadzor idaresi yarımadada koronavirus hastaları vefat etmege devam ete, dep qayd ete.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
