Keçken künü Qırımda 271 koronavirus hastası qayd etildi, 16-sınıñ hastalıq alâmetleri yoq, dep bildirdi dekabrniñ 7-nde saba Qırımnıñ Rusiye yolbaşçısı Sergey Aksenov.
«231 hasta tibbiy yardım içün muracaat etkende qayd etildi, 40-ı daa evel qayd etilgen hastalarnen alâqada oldı. Bütün müddet devamında 12 852 kişi tüzeldi», – dep aytıla içtimaiy ağlardaki haberinde.
Yerli kütleviy haber vastalarınıñ qayd etkenine köre, Qırımda üç künden berli koronavirus hastaları sayısında antirekord qayd etile.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
