Qırımda keçken künü 19 adam öldi ve 837 yañı koronavirus hastası qayd etildi, bu pandemiya vaqtında qayd etilgen rekord COVID-19 hastası oldı.
Bir künde 835 insan yahşı oldı, 19 vefat etti. Bütün müddet devamında 94 628 kişi tüzeldi, 3 235 öldi. Umumen (pandemiya vaqtında – QA) 106 933 COVID-19 hastası qayd etildi.
Tünevin akimiyet 828 koronavirus hastası aqqında haber etti.
Oktâbrniñ 20-nde yarımadada koronavirus ile küreş tedbirleri quvetleştirildi.
Bundan evel Qırımda koronavirus pandemiyası sebebinden ilân etilgen yüksek seviyeli azırlıq rejimi dekabr ayına qadar uzatıldı. Oktâbrniñ 11-nde Qırımda yañı koronavirus sıñırlavları kirsetildi.
Noyabrniñ 8-nden itibaren Qırımda pandemiya sebebinden musafirhanelerde, şifahanelerde ve diger yerlerde yer ayıruv ve qaluvnen bağlı yañı qaideler işke tüşürildi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
