Ukrayina aviatsiyası tarafından qanatlı raketalarnen ücüm etilgen Rusiyeniñ Novoçerkassk desant gemisi bütünley yandı ve, belki de, liman infratekibi de zarar kördi. Bunı Ava quvetleriniñ spikeri Yuriy İgnat bildirdi.
''Foto peyda oldı, anda gemiden qalğan tek bir iskelet bar, er şey yanıp kül oldı. Böyle bir patlav neticesinde tek gemi degil de, belki de, liman infraterkibi, yanındaki teminlev gemileri yoq etildi. Tam olaraq ekipaj yanında olğan edi. Gemini ve işğalcilerni yoq ettik. Bunıñ sebebi - yahşı koordinatsion areketler'', - dep qayd etti o.
İgnatnıñ aytqanına köre, operatsiyanı planlaştıruvda em Silâlı quvetler, em de diger mudafaa quvetleri iştirak etti, "taktik aviatsiya uçucıları ise qanatlı raketalarnen işni soñuna qadar ketirdiler".
Ukrayina arbiy ava quvetleri, gece saat üçte taktik aviatsiya Rusiye Qara deñiz flotunıñ Novoçerkassk adlı büyük desant gemisine qanatlı raketalarnen ücüm etti, dep bildirgen edi.
Ukrayina Ava quvetleriniñ komandanı Nikolay Olesçuk, nişsn muvafaqiyetnen uruldı, dep bildirdi.
Qırımnıñ Rusiye yolbaşçısı Sergey Aksönov Kefe limanına ücüm yapılğanı, ateş açılğanı ve patlatılğanı aqqında bildirdi. Onıñ aytqanına köre, Kefe limanına ücüm neticesinde bir insan elâk oldı, daa ekisi yaralandı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
