Keçken künü Qırımda dört hasta koronavirus yuqunçından vefat etti, pandemiya devamında 904 kişi vefat etti.
Bu aqta Qırımnıñ Rusiye sağlıq nazirliginiñ er künlik monitoring malümatında aytıla.
Müessise, vefat etkenler aqqında tafsilâtlı malümat bermey.
«2508 insan (COVID) ambulator tedaviylevde, 1448 kişi (COVID ve pnevmoniya) hastahanelerde buluna. Umumen 35395 COVID-19 hastası qayd etildi. Tüzelgen 31071 insan yiberildi», – dep aytıla haberde.
Keçken künü Qırımda 79 koronavirus hastası qayd etildi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
