Qırımda keçken künü 92 koronavirus hastası qayd etildi, beş hasta vefat etti, dep bildire yerli akimiyet.
«67 hasta tibbiy yardım içün muracaat etkende qayd etildi, 25 kişi daa evel qayd etilgen hastalarnen alâqada oldı», – dep yazdı Kreml kontrolindeki Qırım yolbaşçısı Sergey Aksenov Facebook saifesinde.
Onıñ malümatına köre, bir künde 109 insan tüzeldi, pandemiya vaqtında 40 319 kişi yahşı oldı.
Mayısnıñ 28-nde saba Rusiye kontrolindeki Qırım Sağlıq nazirligi bildirgenine köre, keçken künü 5 koronavirus hastası vefat etti. Qırımda pandemiya vaqtında vefat etkenlerniñ sayısı 1 341 insan oldı.
«159 insan (COVID) ambulator tedaviylevde, 1585 kişi (COVID ve pnevmoniya) hastahanelerde buluna. Qırım Cumhuriyeti ve Aqyar şeerindeki Rospotrebnadzor idaresi 43191 COVID-19 hastasını qayd etti», – dep aytıla Sağlıq nazirliginiñ matbuat hızmeti haberinde.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
