Keçken künü Qırımda 8 koronavirus hastası qayd etildi. Bu aqta Kreml kontrolindeki Qırım sağlıq nazirliginiñ saytında haber etile.
Böylece, Qırımda vefat etken COVID-19 hastalarınıñ sayısı 438 oldı.
Qayd etilgenine köre, al-azırda 3385 kişi (COVID) ambulator tedaviylevde buluna, 2947 insan (COVID ve pnevmoniya) hastahanede yata, 41 insan observatorlarğa alındı.
Müessise malümatına köre, pandemiya vaqtında yarımadada 21756 COVID-19 hastası qayd etildi, tüzelgen 16410 insan bar.
Qırımnıñ Rusiye yolbaşçısı Sergey Aksenovnıñ bildirgenine köre, keçken künü Qırımda 350 yañı koronavirus hastası qayd etildi, 16-sınıñ hastalıq alâmetleri yoq.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
