Keçken künü Qırımda 202 koronavirus hastası qayd etildi, 4-üniñ hastalıq alâmetleri yoq, dep bildire Qırımnıñ Rusiye yolbaşçısı Sergey Aksenov.
«165 hasta tibbiy yardım içün muracaat etkende qayd etildi, 37-si daa evel qayd etilgen hastalarnen alâqada oldı. Bir künde 55 insan yahşı oldı, bütün müddet devamında 21 875 kişi tüzeldi», – dep aytıla Aksenovnıñ ükümet portalı haberinde.
Qırımnıñ Rusiye Sağlıq nazirligi malümatına köre, bir künde 6 koronavirus hastası vefat etti.
Müessise statistikasına köre, pandemiya vaqtında vefat etkenlerniñ sayısı 597 insan oldı.
«3616 insan (COVID) ambulator tedaviylevde, 3184 kişi (COVID ve pnevmoniya) hastahanede buluna, 5 insan observatorlarğa alındı. Umumen 27783 COVID-19 hastası qayd etildi. 21875 kişi tüzelgen soñ yiberildi», – dep aytıla Qırım nazirliginiñ haberinde.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
