Aqyarda keçken künü altı yañı koronavirus hastası qayd etildi, bir kişi vefat etti. Bu aqta şeerniñ Rusiye ükümetiniñ matbuat hızmeti bildirdi.
«İyülniñ 18-nde saba altı yañı COVID-19 hastası qayd etildi. Üç hasta – daa evel hastalanğan er adamnıñ apayı, qaynatası ve qaynanası. Aqyarğa diger regiondan kelgen erkek ve eki yerli sakinniñ diagnozı da tasdıqlandı», – dep aytıla haberde.
Berilgen malümatqa köre, hronik hastalığı olğan 92 yaşında er adam vefat etti. Akimiyetniñ malümatına köre, «yañı koronavirus yuqunçı ölüm sebebi olğan pnevmoniyağa yol açtı».
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
