Bir kün içinde koronavirus hastalarınıñ sayısı 10452 insanğa arttı, 665 kişi öldi. Martnıñ 16-na qadar dünyada COVID-19 koronavirusınen hastalanğanlarnıñ sayısı 162671 insan oldı, yuqunç qurbanlarınıñ sayısı 6446 insanğa arttı, 75,5 biñden çoq insan tedaviylendi, dep bildire «Nastoyaşçeye Vremâ» South China Morning Post gazetasına esaslanıp.
Neşir memleketlerniñ resmiy malümatlarına esaslanıp, hasta olğan, ölgen ve tedaviylengenlerni saya.
Esas Qıtayda 80844 hasta qayd etildi (3199 kişi vefat etti), İtaliyada – 24747 (1809), İranda – 13938 (724), Cenübiy Koreyada – 8162 (75), İspaniyada – 7753 (1200), ABDde – 2794 (56), İsviçrede – 2,2 biñ (11), Yaponiyada Yokogamada karantinde turğan kruiz gemisinen beraber – 1529 (31), Büyük Britaniyada – 1372 (35), Norvegiyada 1090 (üç kişi).
Bundan ğayrı, koronavirus hastaları daa 131 memlekette qayd etildi.
Martnıñ 11-nde Dünya sağlıq teşkilâtı koronavirus yuqunçı sebebinden pandemiyanı ilân etti.
Yañı çeşit koronavirusnıñ tarqaluvı keçken sene dekabr ayında Qıtaydan başlandı. Qıtay Halq Cumhuriyeti hastalarnıñ sayısına köre lider olıp qala – 80 biñden çoq kişi. Üç biñden çoq insan vefat etti.
Faqat Hubey vilâyetiniñ akimiyeti hastalarnıñ sayısı eksildi dep, karantinni yımşattı.
