Qırımda soñki afta COVID-19 hastalarınıñ sayısı 28% arttı, dep bildirdi Qırımdaki Rospotrebnadzor yolbaşçısı Natalya Penkovskaya koronavirus yuqunçı ile küreş operativ ştabınıñ toplaşuvında.
«Keçken aftağa baqılğanda hasta sayısınıñ 28% artqanı qayd etile. 15-20 insan olaraq artış olğan keçken aftalarğa baqılsa, şimdi bir aftada artış yüzlernen hasta seviyesinde qayd etile. Soñki aftada 2020 senesi bütün sentâbr ayı boyunca qayd etilgen hasta sayısı oldı. Soñki üç aftada hasta sayısı 200% arttı. Eñ çoq çalışqanlar hastalana», – dedi Penkovskaya.
Onıñ malümatına köre, soñki üç afta içinde eñ çoq Kefe ve Sudaqta hastalar qayd etile.
«Eñ çoq Kefe ve Sudaqta hastalanalar. Yaltada soñki üç aftada sayısı sayısı 1,5 qat arttı, Aqmescitte 2 qat arttı, Canköy rayonında – 2,3 qat, Qurman rayonında – 2 qat, Kefe ve Sudaqta – 2,6 qat», – dep qoştı Penkovskaya.
Aynı toplaşuvda Natalya Penkovskaya soñki aftada koronavirus yuqunçından vefat etkenlerniñ sayısı 62% arttı, dep bildirdi.
Qırımda iyülniñ 6-nda 335 yañı koronavirus hastası qayd etildi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
