Bir aftada dünyada eki milliondan çoq COVID-19 hastası qayd etildi, dep aytıla Johns Hopkins Universiteti Sistem tedqiqler merkeziniñ saytında, dep yaza Azatlıq Radiosı.
Oktâbrniñ 19-ı sabasına qadar dünyada aman-aman 39,9 million koronavirus hastası qayd etildi. Oktâbrniñ 12-nde hasta sayısı 37,8 million edi. Bundan daa bir afta ögüne – tahminen 35,5 million.
Şimdi eñ çoq COVID-19 hastası Amerika Birleşken Devletlerinde (8,154 million), İndistanda (7,494 million) ve Braziliyada (5,224 million) bar.
Dünyada bu hastalıqtan vefat etkenlerniñ sayısı 1,1 milliondan çoq oldı. 27,4 kişi tüzeldi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
