Bir afta içinde dünyada 2,5 milliondan çoq yañı COVID-19 hastası qayd etildi, dep aytıla Johns Hopkins Universiteti yanındaki Sistem tedqiqatlar merkeziniñ saytında, dep haber ete Azatlıq Radiosı.
Oktâbrniñ 19-nda dünyada hasta sayısı 40,4 mln edi. Oktâbrniñ 26-nda saba bu raqam 43 mln oldı.
Eñ çoq COVID-19 hastası ABDde (8,64 million), İndistanda (7,91 million) ve Braziliyada (5,39 million).
Umumen dünyada bu hastalıqtan 1153857 insan vefat etti. 28959776 kişi tüzeldi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
