2013-2017 seneleri ABD devlet kâtibiniñ yardımcısı olğan Victoria Nuland bildirgenine köre, yañı saylanğan ABD prezidenti Joseph Bidenniñ memuriyeti Rusiyeniñ Ukrainağa Qırımda ve Donbasta unutıp olamaz. Böylece Nuland «Dojd» Rusiye telekanalına bergen intervyüsında sualge cevap berdi: «Washingtonnıñ Qırım ilhaqı aqqında unutması mümkünmi».
«Ebet, Washingtonnıñ 2013, 2014, 2015 senelerini ve Ukraina, Donbas ve Qırımdaki vaziyetni unutması mümkün degil. Bu imkânsız bir şey. Halqara uqukh normaları bozuldı. Mesele bu. Bilgeniñiz kibi, men devlet kâtibi Kerry ve prezident Obamanen Ukrainadaki zıddiyetni toqtatuv ve Rusiye ordusını çıqaruv muzakerelerinde iştirak etken edim. Moskva bu muzakerelerge qaytmağa azırmı, mesele bu. Mence, buña qol tutarlar, amma bunı daa teşkermek kerek», – dedi Nuland.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
