Rusiye Tış işler nazirligi ABD elçisi Joseph Sullivannı Joseph Bidenniñ Rusiye prezidenti Vladimir Putinni Ukrayinağa keñiş mıqyaslı istilâsına köre "arbiy cinayetçi" adlandırğanı içün çağırdı.
Rusiye TİN martnıñ 21-nde yapqan beyanatında, o, "Beyaz evniñ yolbaşçısı Joseph Bidenniñ Rusiye prezidenti aqqında aytqan qabul etilmez sözleri içün" Sullivanğa narazılıq notası berilgenini bildirdi.
"Amerika prezidentiniñ yüksek rutbeli devlet hadimine yaraşmağan bu kibi beyanatları Rusiye ve Amerika arasındaki munasebetlerni bozuluv altına qoydı", - dep yazıla beyanatta.
Martnıñ 16-nda Amerika Prezidenti jurnalistlernen laf etkende Putinni arbiy cinayetçi adlandırdı.
Bir künden soñ Amerika prezidenti Rusiye devlet başı "kerçek aydut" ve "diktator-qatil" olğanını bildirdi.
O zaman Beyaz evniñ temsilcisi Jen Psaki, Biden bunı telefizorda "zalım diktatornıñ çetel devletke ücümi ile bağlı vahşiy areketleri"niñ resimlerini körgen soñ "yürekten aytqanını" bildirdi.
Fevralniñ 24-nde saba saat 5-te Rusiye prezidenti Vladimir Putin «DNR» ve «LNR» gruppirovkalarınıñ «muracaatından» soñ Donbasta «mahsus operatsiya» başlatqanını ilân etti. Bundan soñ Kyiv, Harkiv, Odesa, Kramatorsk, Berdânskta patlav ve raketa darbeleri aqqında haber etildi.
Ukraina prezidenti Volodımır Zelenskıy umumiy seferberlik buyruğını imzaladı. Ğarp memleketleri Ukrainağa yapılğan ücüm sebebinden Rusiyege qarşı yañı sanktsiyalarnı qullanıp başladı.
Doğrudan ücümge baqmadan, Kreml Ukraina işğali niyetini inkâr ete. Rusiye Mudafaa nazirligi Ukraina tarafınıñ tüşürilgen Rusiye uçaqları, patlatılğan zırhlı tehnika, Rusiye arbiyleriniñ ölümleri aqqında malümatını red ete ve Ukraina şeerlerine ateş açılmay, dep bildire.
Rusiye Mudafaa nazirligi Ukraina tarafınıñ tüşürilgen Rusiye uçaqları, patlatılğan zırhlı tehnika, Rusiye arbiyleriniñ ölümleri aqqında malümatını red ete ve Ukraina şeerlerine ateş açılmay, dep bildire. Başta Rusiye arbiyleri ölgenini inkâr ettiler. Amma fevralniñ 27-nde Rusiye Federatsiyası Mudafaa nazirliginiñ resmiy vekili İgor Konaşenkov Ukrainada ölgen ve yaralanğan Rusiye askerleri bar, dep ayttı. Sayısını aytmadı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: rukrymr.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
