ABD Ukrayınağa yañı arbiy yardımnı ilân etmege niyetlene, dep bildirdi Amerika lideri Joe Biden Kyiv ziyareti vaqtında. Bu aqta Beyaz Saray saytında derc etilgen beyanatta aytıla.
«Dünya Rusiyeniñ Ukrayınağa qarşı deşetli istilâsınıñ yılına azırlanğanda men prezident Zelenskıynen körüşmek ve Ukrayınanıñ demokratiyası, suvereniteti ve topraq bütünligine sadıq olğanımıznı isbatlamaq içün Kyivde bulunam», – dep ayttı Biden.
Amerika lideri top silâsı, tanklarğa qarşı sistemalar ve avadan közetüv radarları olacaq daa bir silâ berilüvi aqqında ilân etecek, dep qoştı – Ukrayına halqına avadan bombardımanlarğa qarşı imayege yardım etmek içün.
Bu afta, siyasetçiniñ aytqanına köre, ABD Rusiyege qarşı qoşma sanktsiyalar aqqında ilân etecek. Reuters agentliginiñ malümatına köre, yardım miqdarı 500 million dollar olacaq.
«Soñki yılda Amerika Birleşken Devletleri Ukrayınanı qorumağa yardım etmek içün Atlantikadan Tınç okeanğa qadar memleketler koalitsiyasını qurdı, arbiy, iqtisadiy ve gumanitar yardım kösterdi – bu destek devam etecek», – dep qayd etti Biden.
ABD prezidenti 15 yıl içinde ilk sefer Ukrayınanı ziyaret ete – 2008 senesi Ukrayına paytahtını George Bush ziyaret etken edi.
Amerika prezidentiniñ Kyiv ziyareti vaqtında büyük ava telükesi signalı berildi. İçtimaiy ağlardaki malümatqa köre, Beyazrusiyede «Kinjal» gipersesli raketalarını taşığan MiG-31K qırıcıları köterildi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
