ABD prezidenti Joe Biden Qırımnı işğalden qurtaruv meselesini cenkniñ yekünlenmesi içün müim saya, amma «başqa meseleler de bar», dep qayd etti. Bu aqta Amerika lideri Vilnüsteki NATO sammitini terk etmezden evel ayttı, dep haber ete Amerikanıñ Sesi.
Jurnalist Bidenge sual berdi: «cenk bitmesini» aytmaq içün Qırım meselesi bütünley çezilmeli, dep tüşünemi.
«Ve daa on yedi mesele bütünley çezilmeli», – dep cevap berdi ABD prezidenti.
O, Qırım müim, amma çezilecek «pek çoq diger mesele» bar, dep ayttı.
Biden Rusiyeniñ Ukrayınağa qarşı cenki «yıllar sürmeycek», dep tahmin etti. «Birinciden: Rusiyeniñ resursları ve imkânlarına baqılsa, cenkni müddetsiz devam ettirecegini tüşünmeyim. Ekincisi: öyle bir al kelir ki, Putin bu cenkni devam ettirmek Rusiyeniñ menfaatlarına ters kelgenini anlar».
Baş kâtib Jens Stoltenberg iyülniñ 11-nde – NATO sammitiniñ ilk künü – «bütün ittifaqdaşlar añlaşsa ve şartlar yerine ketirilse», Ukrayına ittifaqqa qoşuluv davetini alacaq, dep ayttı. O, eki çeşit şart bar, dep qayd etti – Ukrayına mudafaa institutlarınıñ modernizatsiyası ve memlekette devam etken cenk.
NATOnıñ ilk künü neticelerinde Azalıq areketleri planında Ukrayınanıñ ittifaqqa integratsiya yolunda ilerilemesi «ihtiyac çerçivelerinden çıqtı», dep aytıla.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
