Bişkekniñ Ala-Too merkeziy meydanında miting vaqtında çatışmalar oldı, ateş açıldı, dep haber ete «Nastoyaşçeye Vremâ».
Ala-Too meydanında Beyaz ev yanında sabıq prezident Almazbek Atambayev, sabıq baş nazir Omurbek Babanov ve diger siyasetçilerniñ tarafdarları, vatandaş faalleri ve gençler toplaştı. Olar cinayetçi gruppalarğa qarşı çıqıp, deputatlarnıñ toplaşıp, baş nazirni saylamalarını talap etti.
Kaktus.media yazğanına köre, Ükümet evi binası yanındaki Eski meydanda sabıq deputat Sadır Japarovnıñ tarafdarları toplaştı, onıñ namzetini bazı parlament azaları baş nazir vazifesine kösterdi.
Daa soñra kimligi belli olmağanlar Ala-Too meydanına keldi. Berilgen malümatqa köre, bu siyasetçi Sadır Japarovnıñ tarafdarlarıdır. Neticede çatışmalar oldı, insanlar taş ve plastik şişelerni attı. Ateş sesleri de eşitildi. Videoda kimligi belli olmağan kişi maşinağa pıştavdan ateş aça.
Daa soñra Qırğızistan İçtimaiy-demokratik firqasınıñ resmiy vekili Kunduz Joldubayevanıñ Facebookta yazğanına köre, Atambayevniñ maşinasına ateş açıldı, özü yaralanmadı. Firqa sabıq prezidentke ücüm etildi, dep saya.
24.kg neşiri yazğanına köre, çatışma vaqtında sabıq baş nazir Temir Sariyevniñ qaravulı yaralandı: başına taş atıldı, hastahanege alındı. Sabıq baş nazirniñ aytqanına köre, daa bir qaç ortağı zarar kördi.
«Ata Meken» firqasınıñ azası Tilek Toktogaziyev yaralandı, dep haber etile. İlk malümatqa köre, başına taş attılar.
Prezident Sooronbay Jeenbekov oktâbrniñ 9-nda Bişkekte Fevqulâde vaziyetler rejiminiñ ilân etilmesine dair buyruqnı imzaladı: paytahtqa askerlerni kirsetmek emri berildi.
