Bağdatta elâk olğan İran generalı Kasem Suleymani ile vedalaşalar. Bu aqta Azatlıq Radiosı haber ete.
Soqaqlarğa Suleymaniniñ süretlerini, Iraq ve generalnı desteklegen Iraq opolçenleriniñ bayraqlarını kötergen biñlernen insan çıqtı. Yürüş vaqtında olar «Amerika yoq olsun» dep şiarlarını seslendirdi.
ABD mahsus tedbirleri neticesinde öldürilgen Suleymani Tehrannıñ eñ itibarlı ekinci kişi sayılğan edi. Olarnen beraber Iraqnıñ şiiy opolçenleriniñ bir qaç lideri elâk oldı.
Aynı vaqıtta şeerde İran generalınıñ duşmanları, ABD areketlerine qoltutqanlarnıñ narazılıq aktsiyaları olıp keçti. Olar Suleymanini muhalifetke qarşı sert repressiyalar yapqanında, barışıq narazılıqlarınıñ bastırılması ve insan aqlarını bozğanında qabaatlay.
Daa soñra Suleymaniniñ naaşını vatanı İranğa yollaycaqlar, anda üç künlik matem ilân etildi. Bugün bu memlekette ABD areketlerini takbih etken kütleviy aktsiyalar olıp keçti. Miting iştirakçileri Washington mahsus tedbiri regiondaki vaziyetni daa ziyade kerginleştirip, Yaqın Şarqta yañı zıddiyetlerniñ sebebi ola bile, dep qorqa. Olar İran akimiyetinden general ölüminiñ intiqamını almasını ve Amerika ordusınıñ regiondan çıqarılmasına irişmesini talap etti.
İran generalı, «Kuds» quvetleriniñ komandanı Kasem Suleymani Iraqnıñ paytahtı Bağdatta ABD ava darbesi neticesinde elâk oldı. Amerika ve İran memurları yanvarniñ 3-ne keçer gecesi Bağdat ava limanında eki maşinağa endirilgen darbe neticesinde İrannıñ eñ itibarlı memurlarından biri elâk olğanını tasdıqladı.
Pentagon, ABD prezidenti Donald Trump yanvarniñ 2-nde saba ava darbesine qoltuttı, dep bildirdi.
