İşğal etilgen Qırımda yedinci gvardiya desant-ücüm diviziyasınıñ desant-ücüm ve topçı alayları ile büyük taktik talimleri başladı. Bu aqta «RİA Novosti» neşiri Rusiye Mudafaa nazirliginiñ malümat ve kütleviy bağ departamentiniñ malümatına esaslanıp bildire.
«Talimlerge 1,5 biñden ziyade desantçı, 300 daneden ziyade arbiy tehnika, arbiy-naqliye aviatsiyasınıñ uçaqları, ordu aviatsiyasınıñ vertolötları ve Qara deñiz flotunıñ büyük desantçı gemileri celp etildi», – dep aytıla haberde.
Mudafaa nazirliginiñ malümatına köre, eñ körümli levhalardan biri ava-desant orduları bölükleriniñ duşmannıñ idare noqtalarını ve qanunsız silâlı birleşmelerni azırlav lagerini zapt etmek ve yoq etmek maqsadınen arbiy desant gemilerinden tüşürüv olacaq.
Desantçılar gruppirovkanıñ esas küçlerine tüşmege imkân bermek içün elverişli sıñırlarnı zapt etmege tırışacaqlar. Esas küçnen beraber topçı ateş, cebe ve ordu aviatsiyası, uçucısız uçaqlar ve tank bölükleriniñ esapları olacaq.
Haber etilgeni kibi, Rusiye işğal altındaki Qırımda ordularnı quvetleştirdi. Rusiye mudafaa naziri Sergey Şoygu martnıñ 11-nde bu «yarımada ve Rusiye menfaatlarınıñ Qara deñizdeki qorçalavını temin ete», dep bildirdi.
Daa evel haber etilgenine köre, Qırımda martnıñ 1-nde Rusiye raketacıları «Bastion» ve «Bal» sail raketa kompleksleriniñ yardımı ile raketa darbelerini endirip baqtı.
2014 senesi Rusiyeniñ Qırım işğalinden soñ yarımadada arbiy talimler muntazam sürette keçirilip başladı. Ukraina Baş ştabı, Rusiye arbiyleriniñ areketlerini qanunsız dep adlandıra.
