Martnıñ 25-nde saba dünyada koronavirusnen hastalanğanlarnıñ sayısı aman-aman 423 biñ kişi oldı. Bu aqta Johns Hopkins universiteti yanındaki Tedqiqatlar merkeziniñ malümatında aytıla. 18915 insan COVID-19 hastalığından can berdi, 108 573 kişi tüzeldi, dep bildire Azatlıq Radiosı.
Dünya sağlıq teşkilâtınıñ tahminlerine köre, yuqunç tez tarqalğan ve dünyanıñ eñ büyük yuqunç merkezi ola bilecek ABDde 600 insan can berdi, aman-aman 50 biñ hasta qayd etildi.
Pentagon, ABDde qırğınlıq kesen-kes bir qaç ay devam etecek, iyün-iyül aylarında normal yaşayışqa qayta bilecekler, dep tüşüne. Şimdilik eñ çoq ölüm İtaliyada qayd etildi – 6820, 69176 hasta resmiy şekilde qayd etildi.
Qıtaynıñ Hubey vilâyetinde sıñırlav tedbirleri yımşatıla, salı künü sağlam insanlarğa vilâyetni terk etmege izin berildi. Qırğınlıqtan eñ büyük zarar körgen Yuhan şeerinde karantin qaideleri aprelniñ 8-nden başlap yımşatılacaq. Qıtayda hastalanğan 81171 insandan 3277-si can berdi.
İspaniyada hastalanğan aman-aman 40 biñ insandan 2700-ü öldi. İranda 1934 kişi öldi, 24811 insan hastalandı. Frenkistanda 1100 insan can berdi, 22300 kişi hastalandı.
Ukrainada martnıñ 24-nde 97 COVID-19 hastası qayd etildi. Üç kişi can berdi, bir insan tüzeldi.
Rusiyede martnıñ 24-nde aqşam 495 koronavirus hastası tasdıqlandı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
