Rusiye akimiyeti 2019 senesi baarde 2,5 biñ qırımlı ve aqyarlını askerlikke yollamağa planlaştıra. Bu aqta akimiyetke qoltutqan «Krıminform» neşiri Rusiye Qara deñiz flotunıñ haber teminlevi bölüginiñ malümatına esaslanıp bildire.
«Qırım yarımadasından 2,5 biñ insannı saylap, askerlikke yollamağa planlaştırıla. Askerlikke alınacaqlar içün toplaşuv yerinde qabul, genç arbiy taqımlarınıñ yerleşüv ve yollav, aşatuv yeri açıldı. Arbiy bölüklerge yollamadan evel gençlerge arbiy urba ve para yollanacaq şahsiy bank kartları berilecek», – dep yaza Rusiye Qara deñiz flotu matbuat hızmetiniñ malümatını neşir.
Flotnıñ haber teminlevi bölüginiñ malümatına köre, askerlikke alınacaqlarnıñ ekseriyeti qomşu Rusiyeniñ regionlarına yollanılacaq.
«Gençlerniñ çoqusı Qırım tışına, Cenübiy ve diger arbiy okruglarnıñ arbiy bölüklerine yollanacaq. Askerlikke alınacaqlarnıñ büyük qısmı Ordu, aviatsiya ve flotqa yardım göñülli cemiyeti sistemasında alınğan arbiy zenaatlar – yaqıt vastaları, kran ve çekici maşinalarnıñ aydavcıları boyunca yollanacaq», – dep yaza matbuat hızmetiniñ malümatını kütleviy haber vastası.
Qayd etilgenine köre, baarde askerlikke aluv 2019 senesi iyülniñ 15-ne qadar devam etecek.
Kyiv Rusiyeden işğal etilgen Qırım sakinlerini silâlı quvetlerine çağıruvını toqtatmasını talap ete.
QMC prokuraturası qırımlılarnı Rusiye ordusında hızmet etüv içün celpname alğanda telefon ya da elektron poçta vastasınen muracaat etmege rica ete.
Ukrainadaki BM insan aqları monitoring missiyası bildirgenine köre, 2017 senesi eñ az 4800 Qırım sakini Rusiye silâlı quvetlerine çağırıldı.
OSCE ABD işleri vaqtınca vekâletlisi Garri Kamiannıñ malümatına köre, 2018 senesi 5600 qırımlı Rusiye ordusına çağırıldı.
Qırım aq qorçalayıcı gruppasınıñ malümatına köre, Rusiyeniñ Qırım işğali başlağanından berli Rusiye 15 biñ qırımlını askerlikke çağırdı.
