Martnıñ 31-inde olacaq Ukraina prezidenti saylavlarında Qırım Muhtar Cumhuriyetinde ve Aqyarda qayd olunğan 5528 Ukraina vatandaşı rey berüv yerini deñiştirdi.
Bu aqta Ukraina saylavcılarınıñ Devlet reyestriniñ saytı bildire.
Bu malümatqa köre, 4419 qırımlı ve 1109 aqyarlı öz rey berüv aqqını qullanacaq ola. Qırımlılarnıñ çoqusı Kyivde saylavlarda iştirak etecek ola. “Çonğar” kiriş-çıqış noqtasında Qırım memuriy sıñırında, qırımlılarnı Ukraina prezidenti saylavlarında iştirak etmege çağırtqan bilbord qoyuldı.
Hatırlatamız ki, Ukraina prezidenti saylavlarınıñ birinci basamağı martnıñ 31-inde keçirilecek. Namzetlerniñ iç birisi 50%-dan çoq rey almasa, aprel 21-inde saylavlarnıñ ekinci basamağı ötkerilecek. Qırımlılar qıta Ukrainada rey bere bile.
