Beyazrusiyeniñ Gomeli civarında Ukraina ve Rusiye eyyetleri arasında muzakereler başladı. Bu körüşüv devam etken cenk sebebinden ilk şartlarsız teşkil etildi. Bu aqta Ukraina prezidentiniñ ofisi haber ete.
«Muzakerelerniñ esas mevzusı – ateşniñ acele toqtatılması ve Ukrainadan ordularnıñ çekilmesidir», – dep aytıla Ukraina prezidenti Volodımır Zelenskıynıñ ofisi haberinde.
Ukraina eyyetiniñ erkânına kirgenler:
- «Sluğa narodu» fraktsiyasınıñ reisi David Arahamiya,
- Ukraina mudafaa naziri Oleksiy Reznikov,
- Prezident ofisiniñ reber mesleatçısı Mıhaylo Podolâk,
- Üç taraflı bağ gruppasınıñ Ukraina eyyeti yolbaşçısınıñ birinci muavini Andriy Kostin,
- Ukraina halq deputatı Rustem Umerov,
- Ukraina Tış işler naziriniñ muavini Mıkola Toçitskiy.
Rusiye eyyetiniñ yolbaşçısı Rusiye Federatsiyasınıñ prezidenti Vladimir Putinniñ yardımcısı Vladimir Medinskiy ola. Muzakerelerge kelgenler:
- Rusiye Federatsiyasınıñ Beyazrusiye elçisi Boris Grızlov,
- deputat Leonid Slutskiy,
- Rusiye Federatsiyasınıñ Tış işler naziriniñ muavini Andrey Rudenko,
- Rusiye Federatsiyasınıñ mudafaa naziriniñ muavini Aleksandr Fomin.
Taraflar Ukraina sıñırına yaqın bir yerde Prıpyat özeni yalısında körüşecek.
Fevralniñ 26-nda Putinniñ spikeri Dmitriy Peskov Rusiye kütleviy haber vastalarına fevralniñ 25-nde kündüz «beklenilgen muzakereler sebebinden» Rusiye prezidenti ordunıñ Ukrainağa ilerilemesini toqtatmağa emir etti, dep bildirgen edi. Kremlniñ malümatına köre, fevralniñ 26-nda esas Rusiye quvetleriniñ areketi «muzakereler olmağanı içün» yañıdan başladı.
Ukraina prezidenti ofisiniñ reber mesleatçısı Mıhaylo Podolâk prezident Volodımır Zelenskıy Rusiye tarafınıñ Ukraina qabul etmeycek iç bir şart ve uzlaşuvğa razı olmay, dep bildirdi.
Fevralniñ 27-nde prezident Volodımır Zelenskıynıñ spikeri Sergey Nikiforov Rusiye eyyeti kelgen Gomeldeki (Beyazrusiye) muzakerelerde Ukraina vekilleri olmaycaq, dep haber etti.
Fevralniñ 24-nde saba saat 5-te Rusiye prezidenti Vladimir Putin «DNR» ve «LNR» gruppirovkalarınıñ «muracaatından» soñ Donbasta «mahsus operatsiya» başlatqanını ilân etti.
Prezident Volodımır Zelenskıy umumiy seferberlik buyruğını imzaladı. Ğarp memleketleri Ukrainağa yapılğan ücüm sebebinden Rusiyege qarşı yañı sanktsiyalarnı qullanıp başladı.
Doğrudan ücümge baqmadan, Kreml Ukraina işğali niyetini inkâr ete. Rusiye Mudafaa nazirligi Ukraina tarafınıñ tüşürilgen Rusiye uçaqları, patlatılğan zırhlı tehnika, Rusiye arbiyleriniñ ölümleri aqqında malümatını red ete ve Ukraina şeerlerine ateş açılmay, dep bildire.
