Beyazrusiyede koronavirus hastalarınıñ sayısı 12 kişiden 21 insanğa arttı, dep bildire «Nastoyaşçeye Vremâ» yerli Sağlıq nazirliginiñ malümatına esaslanıp,
«Bugünki künde Beyazrusiye sağlıq müessiselerinde COVID-19 hastalığı tasdıqlanğan 21 insan buluna», – dep aytıla Sağlıq nazirliginiñ haberinde.
Müessise bildirgenine köre, bu memlekette qayd etilgen yañı koronavirus hastalarınıñ umumiy sayısıdır, daa evel 12 hasta aqqında haber etilgen edi.
«Aman-aman bütün hastalarnıñ alı bir qarar, bir kişi orta ağır alda buluna», – dep qoştı müessise.
Daa evel haber etilgenine köre, Beyazrusiyede COVID-19 yuqunçınen hastalanğan ilk kişi hastahaneden çıqarıldı.
Yañı çeşit koronavirus yuqunçı 2019 senesi dekabr ayında Qıtayda tarqalıp başladı.
2019-nCov (COVID-19) virusı büyük koronaviruslar gruppasına aittir. Bazılarda hastalıq qolay keçe, bazılarınla suvuqlanuv ve gripp alâmetleri, em de yüksek sıcaq ve öksürik bar, ağır hastalarda nefes tarlığı qayd etile. Bu öldürici ola bilecek pnevmoniyağa keçe bile.
