Beyazrusiye akimiyeti Gomel vilâyetiniñ üç rayonına kirişni sıñırladı: Ukrayına ile sıñırdaki Loyev, Bragin ve Hoynik.
Azatlıq Radiosınıñ Beyazrusiye hızmeti bildirgenine köre, bu aqta «Devlet sıñırınıñ telükesizligini temin etüv tedbirleri» vesiqasında aytıla. Sıñırlav sebebi Beyazrusiye baş naziri Roman Golovçenko imzalağan vesiqada aydınlatılmay.
Beyazrusiyeniñ Bragin, Loyev ve Hoynits rayonlarınıñ sıñır alanına kiriş izni kimge berile:
- İş vazifelerini becermek içün sıñır alanına çıqqan şahıslar;
- Yaşağan yerine ve andan ketecekler;
- Yaqın soyları yaşağanlarğa ve andan keteceklerge.
İstisna olaraq böyle bir izin Beyazrusiye Devlet sıñır komitetiniñ reisi ya da vekâletlisi tarafından berile bile.
Ukrayına Silâlı quvetleriniñ strategik bağlar idaresi qayd etkenine köre, bu rayonlardan 2022 senesi fevral ayında Rusiye Kyivge ücüm etip başladı. «Belorusskiy gayun» Beyazrusiye telegram kanalı Rusiye arbiy tehnikası Ukrayına ile sıñırğa keçe, dep haber etti.
Ukrayına Mudafaa naziri Oleksiy Reznikov Rusiye bugünki künde Beyazrusiyede ücüm gruppirovkasını qurmadı, dep bildirdi.
Beyazrusiye Ukrayınadaki cenkniñ iştirakçisi degil, amma Rusiye istilâsına maddiy-tehnik yardım köstere. Hususan Rusiye ordusına Beyazrusiyege kirmege imkân bere, andan ise Rusiye quvetleri Ukrayına şeerlerine bombardıman yapa, Ukrayınağa raketa ata.
