Beyazrusiye Merkeziy saylav komissiyası avgustnıñ 10-nda prezident saylavlarınıñ birinci neticelerini ilân etti. Resmiy malümatqa köre, Aleksandr Lukaşenkoğa 4 562 423 saylayıcı rey berdi – 80,23%, Svetlana Tihanovskayağa 574 312 insan rey berdi – 9,90%, beyazrusiyelilerniñ 6,02%-ı er keske qarşı rey berdi, dep haber ete «Nastoyaşçeye Vremâ».
«Malümat daa teşkerilecek, amma çoq deñişecegini tüşünmeyim», – dep bildirdi Beyazrusiye Merkeziy saylav komissiyasınıñ yolbaşçısı Lidiya Yermoşina.
Minskte saylav bölükleri qapatılğan soñ OMON hadimleri akimiyet ilân etken saylav neticelerine qarşı soqaqlarğa çıqqan narazılıq bildirgenlernen çatıştı. Beyazrusiye kütleviy haber vastalarınıñ esaplarına köre, tahminen 20 biñ insan soqaqlarğa çıqtı, arbiy tehnika çıqarıldı. OMON ses ışıq granatalarını ve köz yaşlatıcı gaznı qullandı.
Caddelerden birinde narazılıq bildirgenlerni avtozak urdı. Eki yaralı bar, birisi ağır alda buluna. Şeer icra komiteti nazirliginiñ iç işler baş idaresi avtozak olğan yol qazasını tasdıqlamadı.
Devlet exit pollınıñ neticelerine köre, Lukaşenko reylerniñ 79,9%-ını, Tihanovskaya 6,8%-ını qazandı. Exit pollnıñ ilk neticelerine köre, çetel bölüklerinde Svetlana Tihanovskayağa saylayıcılarnıñ 71%-ı rey berdi.
Soqaq narazılıq aktsiyaları Sankt-Peterburg, Moskva, Kyiv Beyazrusiye elçihaneleri ögünde başlandı, anda istegi olğan çoqusı insanlar rey berip yetiştirmedi.
Az sayıda mustaqil közeticiler (bölüklerge er kes kirsetilmedi) Beyazrusiyede çalışıp, bir çoq bozuv aqqında bildirgen edi: komissiya hadimleri olarnı içeri almadı (bina tışında pencerelerden baqıp közetmege ya da tışarıda çeçeklik yanında turıp közetmege mecbur ediler, şikâyet berilgende militsiyanı çağıralar ve atta insanlarnı tutalar.
