Aprelniñ 16-nda Beyazrusiyede 4202 koronavirus hastası qayd etildi, Ukrainada olarnıñ sayısı 4161 oldı. Bu aqta «Nastoyaşçeye Vremâ» haber ete.
Beyazrusiyede qayd etilgen koronavirus hastalarınıñ sayısı million içinde 442 insan ola, Ukrainada – million içinde 99 hasta.
Azatlıq Radiosınıñ Beyazrusiye hızmeti Ukrainada yapılğan testlerniñ sayısı Beyazrusiyeden azdır, dep qayd ete. Derc etilgen malümatqa köre, aprelniñ 13-ne qadar Ukrainada 32 496 test yapıldı, Beyazrusiyede – 68 biñ.
Pandemiya vaqtında Beyazrusiyede, resmiy malümatqa köre, 40 koronavirus hastası vefat etti, 65 kişiniñ aqcigeri suniy şekilde avalandırıla. Soñki künde hastalarnıñ sayısı 476-ğa arttı, dört kişi vefat etti. Hastalar arasında 116 bala bar.
Sağlıq nazirligi bildirgenine köre, aman-aman episi hastalıqnı alâmetsiz ya da yengil keçire. Beyazrusiye akimiyeti hastahanede bulunğan hastalarnıñ, orta ve ağır alda bulunğan hastalarnıñ sayısını bildirmey. Aprelniñ 16-nda Sağlıq nazirligi yengil alda olğan COVID-19 hastalarını evlerine yiberip, anda tedaviylemege emir etti.
Beyazrusiyede karantin ya da özüni izolâtsiya etüv resmiy şekilde ilân etilmegen. Mektep tatili ise aprelniñ 20-ne qadar uzatıldı. Beyazrusiye – pandemiya vaqtında futbol çempionatı keçirilgen yekâne Avropa memleketidir. Kilselerde ibadetler yapıla, aprelniñ 25-ne ise memlekette cumhuriyet talaqanıñ keçirilüvi planlaştırıla.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
