ABD prezidenti Joe Bidenniñ memuriyeti Ukrayına lideri Volodımır Zelenskıynıñ taqımını cebede «muvafaqiyetlerni pekitip», yañı qarşı ücüm başlatmasına çağırdı. Bu aqta Politico neşiri memurlar arasındaki menbalarğa esaslanıp yaza.
Beyaz Saray Kyivge silâ ABD ve Avropadan maniasız kelgende qarşı ücümge azırlanmağa tekvsiye etti. Neşirniñ malümatına köre, Bidenniñ memuriyeti Avropa memleketleriniñ destegi sıñırlana bile, dep qasevetlene.
Washingtonda Ukrayınağa yardım etilüvine eki firqa kongressmenleri qoltuta – Demokratik ve Cumhuriyet. Amma, Politico yazğanına köre, Bidenniñ memuriyetinden bazı memurlar ileride ekseriyeti cumhuriyetçilerde olğan Vekiller palatasında tirenüv artqanı içün Kyivge arbiy yardım yollamaq qıyın ola bile, dep qasevetlene.
Berilgen malümatqa köre, Beyaz Saray Kyivge fevralniñ 20-nde – Rusiyeniñ Ukrayınağa qarşı tam istilâsınıñ yılı arfesinde – Bidenniñ Poloniya ziyareti sebebinden qarşı ücümni keçiktirmemege tevsiye etti.
Ziyaret vaqtında Biden Poloniya prezidenti Ancey Duda ve NATO liderlerinen körüşecek, em de Kyivge qoltutmağa kerek olğanını qayd etecek. Poloniya kütleviy haber vastaları bu ziyaret vaqtında Biden Zelenskıynen körüşe bile, dep bildirgen edi. Beyaz Saray böyle bir körüşüv planlaştırılmay, dep haber etti.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
