Soñki künleri Ukrayına arbiyleri cebeniñ cenübiy yönelişinde «körüngen ilerilevge» irişip oldı, dep qayd etti Beyaz saraynıñ milliy telükesizlik meseleleri vekili John Kirby, dep haber ete AFP agentligi.
Memleketniñ cenübinde Ukrayına Silâlı quvetleriniñ Rusiye ordusına qarşı ücümi «üç ayda ilerilemedi» tenqidi aqqında sualge cevap berip, Con Kirbi «küreş Ukrayına ümüt etkeninden daa yavaş oldı», dep tanıdı.
O, Ukrayına silâlı quvetleri «Rusiyeniñ ekinci mudafaa çizgisinde belli muvafaqiyetke» irişip oldı, dep qoştı.
Amerika Cenkni tedqiq etüv institutı (ISW) Ukrayına Silâlı quvetleriniñ Zaporijjâ vilâyetiniñ ğarbiy qısmında ve Bahmut rayonında ilerilegenini qayd etti.
ISW Ukrayına tarafınıñ avgustnıñ 31-nde Ukrayına Silâlı quvetleriniñ bu rayonda ilerilegenini qayd ete. Aynı vaqıtta, talilciler aytqanına köre, Rusiye tarafı Donetsk ve Zaporijjâ vilâyetleri arasında memuriy sıñır boyunca Ukrayına ücüminiñ devamını tanıy, amma Ukrayına Silâlı quvetleri ilerilemedi, dep qayd ete.
Cenkni tedqiq etüv institutı Rusiyeniñ arbiy blogerleriniñ bildirgenine köre, cebede Rusiye Federatsiyasınıñ Arbiy quvetleri mudafaa qurulışlarınıñ erkânı «Rusiye quvetlerine qarşı ücüm yapmağa imkân bermey».
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
