Amerika akimiyeti Rusiye topraqlarındaki nişanlarğa darbelerni desteklemey – böyle Beyaz ev iyülniñ 24-nde Moskvağa pilotsız uçaqlar ücümini izaatladı.
Prezident müdiriyetiniñ temsilcisi Karin Jan-Pyer bunıñ ABD Ukrayina qısmı dep tanığan işğal etilgen Qırımğa ukrayin pilotsız uçaqlarınıñ endirgen darbelerge alâqası yoq dep qayd etti.
Jan-Pyer dronlarnıñ Moskvağa ücümi RF başlatqan cenkniñ aqibetidir, dep bildirdi.
"Bu Rusiye başlatqan cenktir. Bu olarnıñ cenki. Olar onı başladılar ve olar da istegen zaman onı toqtata bileler. Ukrayina şeerlerine ve adamlarına ücüm yerineUkrayina topraqlarından öz ordusını çıqarıp bunı toqtata bileler", - dep ayttı o.
İyülniñ 24-nde saba eki uçucısız cihaz Moskvağa ücüm etti. Ciddiy zarar yoq, kimse yaralanmadı, dep bildirdi Moskva akimiyeti. Rusiye Mudafaa nazirligi Ukrayinanı qabaatladı. Ukrayina arbiyleri Moskvağa qarşı ücüm malümatını izaatlamadı.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Yarımadada yüksek (sarı) terror telükesi bar. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
